Afisa Mtendaji Mkuu kutoka Wakala wa Usajili wa Biashara na Leseni (BRELA), Bw. Godfrey Nyaisa amewahimiza Wakazi wa Morogoro na maeneo ya jirani kuchangamkia fursa ya uwepo wa taasisi hiyo Katika Mkoa huo.

Bw. Nyaisa amebainisha hayo jana Mei 10, 2022 alipofika katika Banda la BRELA kwenye Maonesho ya Tano ya mifuko na programu za uwezeshaji wananchi Kiuchumi.

"Ushiriki wa Wakala katika maonesho haya kunatoa fursa kwa wakazi wa Morogoro na maeneo ya jirani kupata huduma kwa ukaribu, hii ni fursa ya kipekee kwa sababu tofauti na ilivyo kawaida Usajili unakamilika papo kwa papo na mtu anaondoka na cheti chake" amesema Bw. Nyaisa.

Pia alitumia fursa hiyo kuwakabidhi vyeti vya Usajili wadau wa BRELA waliokamilisha sajili zao papo kwa papo na kuwahimiza wananchi kujitokeza kwa wingi katika Banda la BRELA ili kupata elimu ambayo itawasaidia katika kufanya biashara zao.

Kwa Upande wa Mkuu wa Wilaya Bw. Abert Msando ameipongeza BRELA kwa huduma inazozitoa na kuwahimiza wananchi kutumia fursa hiyo muhimu.